صور توضح .. خسارة 15% دهون خلال سنة

السلام عليكم ..
تحيتي لكابتن قاعود ذو الفضل الكبير في فهم آلية عمل أجسامنا مما جعلنا نكسب صحتنا قبل خسارة دهوننا .


ربما تلك النتيجة ليست الأفضل إذا إهتممنا بالنظر إلى الرقم الذي خسرته من وزني في هذه الفترة الطويلة
ولكن على الجانب الآخر عدم التسرع في خسران الوزن هذا ، لم يفقدني الكثير من العضلات وهذا شيء لو تعلمون عظيم ..



تحديث :

 

ما شاء الله تبارك الله

 

شكرا لردك يا كابتن أحمد

أنا فعلا يا كابتن ماشي على كلامك فى النظام الغذائي بالمسطرة .. والنتيجة مذهلة فعلا .. لدرجة إن فى ناس حاليا وأنا فى التمرين بتيجي تسألني عن المكملات أو المنشطات اللي باخدها .. وأنا كل اللي بعمله إني بعمل اللي حضرتك بتقوله مش أكتر .

 

ماشاء الله تبارك الله
عقبالنا

 

إن شاء الله هتحقق أحسن من كده .. أهم حاجة أقرا كتير فى موقع Egyfitness نفسه اللي فيه المقالات .. القراءة أهم حاجة
وده فى حد ذاته هيحطك فى مود التنفيذ .. وكل فترة حاول تعيد تنظيم المعلومات اللي فهمتها وتقيم أدائك
هتلاقي نفسك بتقرب من هدفك بسهولة ..
المهم الصبر .. عشان هو اللي هيدعمك فى رحلتك

 

اللهم صل على سيدنا محمد
ربنا يبارك في اللي انت عملته و يزيدك من اللي بتتمناه ان شاء الله

بس ممكن تساعدنا بردو في موضوع التغذيه ده ؟.... يعني مثال لاكتر من شكل من اشكال الفطار او الغداء او العشاء و السناكس و ياريت لو اكتر من مثال علشان نفهم بصوره اعمق

 

عليه الصلاة والسلام .. آمين وإياكم يارب
أنا اللي أساعدكم فى موضوع التغذية !
ده موقع كابتن محمد قاعود كله أمثلة وشرح .
بس لو تقصد الكلام ده أقوله فى فيديو .. فلازم نستأذن من الكابتن .

 

اولا ماشاء الله
ثانيا انا حصلي حاجة كده لخبطة من كتر القراءة ومش عارف اعمل ايه بقالي فترة كبيرة ف التمرين ولسه موصلتش لحاجة
والله حاسس بيأس فظيع الله المستعان
نفسي اعرف اكل ايه واتمرن ايه وايه المناسب ليا لكن للأسف
معذرة للإطالة

 

فترة كبيرة .. حوالي أد ايه ؟
وموصلتش لحاجة معناها ايه ؟ انك مش عارف تخس ؟ ولا مش عارف توصل للضخامة العضلية ؟
وهل أنت حاليا اصلا فى فترة تخسيس ولا ضخامة ؟
هل بتحسب احتياجاتك من السعرات مظبوط وبتوزن أكلك بدقة ؟
هل بتاخد احتياجاتك من البروتين مظبوط ؟
هل بتنام عدد ساعات مظبوط ؟
هل بتلعب صح فى الجيم ولا مجرد بتمرجح الأوزان ؟
باختصار حاول تخليني اعرف المشكلة فين عشان اقدر اساعدك

 

السلام عليكم
شكرا جدا لك على الاستجابة والرد
اولا انا منذ ٣سنين عملت رجيم ونزلت من ٩٦ الى ٧٥ ووزن الحالي ٧٨
مستمر في تمارين الحديد من فترة لاكثر من ٣ سنين
المشكلة اني مش عارف اوصل للضخامة العضلية
بحسب سعراتي بوزن اكلي ولكن احيانا سعراتي تكون أكثر او اقل من المطلوب
احتياجي من البروتين مش مظبوط
نومي ٦ ساعات تقريبا
ادائي مظبوط في الجيم بشهادة المدربين وجسم واخد شكل دون تكتيل
كل ما اتمناه برنامج تدريبي جيد لي وتعبت من القراءة والمشاهدة هل برنامج لدوريان ياتس مناسب او لاين نورتون وكيف اعلم ما هو مناسب لي
بالاضافة الى نظام غذائي غير مكلف في حدود ١٨٠٠ سعر لأصل الى ١٠% بدلا من ١٣% الحالية
في خلال فترة تمريني استعنت ببعض المكملات ولكن ليس بشكل دائم وفقا للظروف المادية ولذلك لم الاحظ فرق

 

اسف للإطالة

 

فى 3 نقط عاوز أوضحهملك :
الأولى : أول سنة من التمرين كانت الأهم عشان تزيد عضلات بصورة ملحوظة حوالى 10 كيلو عضل صافي
والنسبة بتقل السنة التانية حوالي 5 كيلو والتلاتة بتكون عملية الزيادة بطيئة جدا حوالي 2 كيلو والرابعة 1 كيلو
ففرصة الزيادة بعد أكتر من 3 سنين تمرين فى إعتقادي تم استهلاكها .

التانية : إنك مقلل الكالوريز بتاعتك .. والضخامة محتاجة تزود الكالوريز من 500 لـ 1000 كالوري فوق إحتياجاتك .. ورغم إن النقطة دي غير منطبقة عليا .. لأنى مقلل سعراتي ومع ذلك وصلت لحجم معقول نسبيا .. أو أنا راضي عنه .. إلا إن شرط أساسي إنك تزود سعراتك عشان تزيد .. لكن الكلام ده مينفعش فى الوقت اللي انت بتخس فيه .. وهي دي الضريبة اللي بندفعها نتيجة إهمالنا فى وززننا .
وطالما قربت توصل لـ 10 % .. فتقدر بمجرد ما توصل تقدر تبدأ ضخامة وتزود سعراتك من تاني لحد ما توصل لـ 15% وترجع تنشف تاني لـ 10 %

التالتة : البروتين = عضلات .. لو احتياجك منه مش مظبوط يبقى مستنى عضلات إزاي ؟

وصدقني أهم من البرنامج التدريبي .. هو إنك تتمرن صح وتزود اوزان باستمرار .. وتاكل صح .. وتنام صح .
أنا شخصيا بعمل برامج التدريب لنفسي .. وهي برامج تقليدية جدا فى الغالب ومبغيرش البرنامج غير كل ـ 6 شهور .
لأن الفكرة من البرنامج انك تركز على زوايا عضلية ضعيفة .. اما وقت الضخامة فالمهم زيادة الحمل على العضلة .
بالنسبة للمكملات دي حاجة ترجعلك حسب نقصان أكلك من بعض العناصر الغذائية .

الخلاصة مشكلتك هتتحل نسبيا لو :
1- دخلت مود الضخامة وبدأت تزود سعراتك من 500 لـ 1000 كالوري لحد ما توصل لـ 15 % دهون.
2- أخدت الكمية الظبوطة من البروتين .. 2.2 لكل كيلو من وزنك.
3- الإهتمام بزيادة الأوزان اللي بتشيلها .
4- زودت عدد ساعات نومك شوية .

الحاجات دي هي الزيتونة بتاعة الضخامة باختصار .

 

مع كامل احترامى ليك اتفق معاك فى قل الى التة بس نقطة زيادة العضلات فى فترة التخسيس كل الناس الى فى فترة تخسيس ويتمرنة صح وبياكلة بروتين صح الكتلة العضلية بتزيد عندهم بشكل ملحوظ

 

ضخامة عن ضخامة تفرق .. والراجل بيسأل على ضخامة يحس منها بفرق .
زي كده لما أسئل حد يوصفلي طريق يوديني (رمسيس) .. فواحد يقولي خد طريق صلاح سالم على طول ، وواحد يلففني الكرة الأرضية .
فى الآخر كده كده الطريقين هيوصلوك رمسيس .. لكن أنهي طريق يحقق هدفك بشكل دقيق وسريع ؟
عملية البناء وتجديد الألياف العضلية .. بتحتاج طاقة كبيرة جدا .. فبيكون محتاج لطاقة أكبر عشان البناء ده يتم .. وأسرع طريقة تحقق الكلام ده بكفاءة هي زيادة السعرات .. بمنتهى البساطة .

 

مش عارف اشكرك ازاي انا تقريبا حاسس بالكلام اللي انت قلته وبحاول اطبقه على ما استطيع ولكن من وقت الرجيم واللي وصلت له وانا عندي هسهس من الاكل مش عايز أرجع للبطن وخلافه تاني وعشان كده كنت سالت كابتن قاعود على شكل وتقسيم عضلة البطن وتحديدا السفلى فرد ان لازم اوصل بنسبة دهوني ل ١٠ أو ٨%

 

هذا هو الواقع

 

أنا شايف إن ما شاء الله الحجم كويس .. اهتم بس بزيادة الأوزان .. وحاول يكون هدفك إن تشيل وزنك للعضلات الكبيرة
يعنى لو وزنك 80 كيلو .. حاول يكون هدفك انك تشيل في البنش والظهر 80 كيلو يزيد أو يقل حاجات بسيطة .
المهم خلي الكلام ده هدف قدامك وحاول توصله .

 

جزاك الله كل خير
وشكرا للاهتمام والرد
وعلى فكرة فتحت نفسي تاني والله كتر خيرك

 

عاش أوي .. تحت أمرك يا كبير .. وإن شاء الله من تقدم لتقدم