أهمية تمارين رفع الأثقال

السلام عليكم
اغلب الناس عندها فكرة ان تمارين الحديد " كمال الأجسام تحديدا او bodybuilding" مجرد شكل و منظر بس

و ان فايدتها الوحيدة هي بس تحسين شكل العضلات فقط

من غير أثر في تحسين الأداء الرياضي بل بالعكس بتثقل الجسم كوزن و بتصلبه و بتقلل المرونة العامة للجسم

ده غير أن البعض بيقول انها رياضة مكلفة على الفاضي و ان الجري مثلا او تمارين وزن الجسم " السويدي" في أسوأ حالاتها افضل من حيث اللياقة و المرونة حتى اوفر في الفلوس " مفيش معدات مطلوبة"

يعني من الآخر رياضة استعراضية فقط مش اكثر من كده

ايه رأيكم في الكلام ده و ايه رأيك يا كابتن محمد قاعود
يا ريت اغلب الكباتن و الأعضاء في المنتدى تشارك و يتفتح الموضوع للنقاش

 

بداية أنا مبتدئ وغير مختص أو خبير، فأرجو إن لو فيه خطأ يُصحح وإن كلامي لا يؤخذ على محمل الثقة التامة.
كلامي مجرد خلاصة بحث عن الموضوع حتى الآن واستفادة مما قدمه ايجي فيتنس الرائع وبعض فيديوهات اليوتيوب والمقالات..

خلاصة الموضوع في سطرين:
- لو عايز جسم متناسق وصحي ومش مهم عندك عضلات زي عضلات الجيم = العب Bodyweight أو ما يُعرف بالـ calisthenics
- لو عايز جسم متناسق وعضلات زي الجيم = ضروري هتلعب حديد ولا غنى عنه ومش معنى إنك بتلعب حديد إنك هتصحى من النوم تلاقي نفسك بطل كمال أجسام فجأة وعضلات ضخمة بشكل مبالغ فيه.. أنت بتتمرن ولما تلاقي العضلة شكلها بقى Over وأنت مش عايز دا وقف تمرين فيها (أعتقد دي جمل لكابتن قاعود )

عن نفسي حاليا لأني في مرحلة تخسيس بعتمد على ال calisthenics لقوة التحمل وبعد أسبوعين هعتمد العبها بأوزان وازود الأوزان كل مدة معينة = وبالتالي هيكون عضلات مناسبة زي الفتنس موديل (لما اوصل لنسبة دهون 10% فأقل طبعًا كما تعلمت من المنتدى) وبعد كدا هدخل الحديد بإذن الله


ولكن سؤالي اللي هروح اساله دلوقتي في موضوع منفرد: هل ال calisthenics بأوزان أعلى كل مرة بينما لم أصل لنسبة دهون 10% سيكون له أثر على العضلات عندما تصل نسبة الدهون 10% فأقل أم أنه مجهود ضائع؟ وهل الأفضل انتظر بخصوص زيادة الاوزان فيها إلى أن تصل الدهون لـ 10% كي لا اصل إلى طريق مسدود وأوزان كبيرة عندما افقد الدهون؟