إزاي تقلل التسوس بشرب المياة !

السلام عليكم .. جمعة مباركة

عارف ايه الجميل فى برنامج غذائي محسوب بدقة لجسمك ؟
أنه مش بس بيعمل Transform أجمل (لشكل) جسمك ..
بل بيعمل Transform أجمل (لتفاصيل) صغيرة فيك زي .. ابتسامتك!

فى بدايات القرن العشرين .. شافوا مجموعة من الناس لون أسنانها بني ! بس الغريب انهم مكنش عندهم تسوس بالرغم من لون أسنانهم العجيب! ولما دوروا فى الموضوع لاحظوا إن الناس دي بيشربوا من مياة تركيز (الفلورايد fluoride) عالي فيها . (يعني الفلورايد تركيزه كان عالي فخلى أسنانهم متسوسش بس لونها بني!)
ومن خلال الدراسات بدأ يظهر إن الفلورايد ده فعلا بيخلي طبقة المينا اللي بتحمي الأسنان مبتتأثرش ومبتدوبش فى الأحماض اللي بتنتجها البكتريا ، وده السبب اللي بيخليه بيقلل من تسوس الأسنان . (وبالتالي لو تركيزه ناقص هيتسبب نقصه فى التسوس).
-=-=-=-=-=-=-=-=-=-=-=-
المصادر الطبيعية :
▪️- (المياة) لإن تركيزه فى المياة الغير ملوثة بيكون مثالي جدا وبيديلك احتياجك اليومي لو بتشرب كمية كافية من المياة .
لتر المياة فيه 712 ميكروجرام من الفلورايد .. يعني الـ 3 لتر يدوك 2.13 مجم .
▪️- (الشاي) كوباية الشاي الـ 230 ملي تديلك 884 ميكروجرام فلورايد .
▪️- الألبان ومنتجات الألبان والمأكولات البحرية فيها نسب من الفلور.
الفلور موجود فى مصادر تانية للأسنان بس مش طبيعية زي معجون الأسنان وغسول الفم .
-=-=-=-=-=-=-=-=-=-=-=-
الاحتياجات اليومية :
(الكميات اليومية الموصى بيها أو الـ RDA) الآمنة والكافية للفلورايد :
- للأطفال :
▪️- بعمر 0-6 شهور : 0.01 مجم
▪️- من 7-12 شهر: 0.5 مجم
▪️- من 1-3 سنين : 0.7 مجم
▪️- من 4-8 سنين : 1 مجم

- للبالغين الذكور :
▪️- من 9-13 سنة : 2 مجم
▪️- من 14-18 سنة : 3 مجم
▪️- من 19 سنة فيما فوق : 4 مجم

- البالغين الإناث :
▪️- من 9-13 سنة : 2 مجم
▪️- من 14 فيما فوق : 3 مجم

-=-=-=-=-=-=-=-=-=-=-=-
حوالي 96٪ من الفلوريد اللي في جسمك موجود في العظام والأسنان. بيساهم فى حاجة اسمها Mineralization أو الحد من عملية فقدان المعادن .. لذلك النقص فيه هيسبب تسوس الاسنان، وممكن كمان يتسبب فى تأخير التئام العظام المكسوره ! فياريت تلتزم بالكمية الموصى بيها حسب سنك.

وطبعا زي ما وضحنا لو الموضوع زاد عن حده بيقلب بتسمم من أعراضه تغير لون الأسنان للون بني !
-=-=-=-=-=-=-=-=-=-=-=-
الغريب بقى إننا بلد هبة النيل ومع ذلك هبة مبتشربش مياة بشكل كافي .


Yalla Transform
Ahmed Adel

 

ضحكتني عندكم نهر وماتشربون ومتعجبين اجل احنا عندنا نهرين ومائنا مالح! مالاكثر اضحاك نحن او انتم؟