افهم جسمك - الجزء الأول (مقالة بالعامية المصرية)

هنقتحم الأحداث وهندخل فى المرحلة التالتة بعد (المرحلة الأولى اللي اسمها الهضم) و(المرحلة التانية اللي اسمها الامتصاص) .. بنيجي للمرحلة التالتة واللي اسمها (التنفس الخلوي)


السلسلة دي هيكون هدفها تفهم ايه اللي بيحصل فى جسمك من وقت ما بتاكل لحد ما جسمك بيستخلص الطاقة من الأكل ..
عشان تعمل فورمة محتاج تغذي جسمك بالأكل وعقلك بالعلوم .. وعشان كده عملت هاشتاج فورمة العلوم وافهم جسمك.. واللي هيضم مجموعة مقالات هتشرحلك بعض التفاصيل وتربطلك بعض المعلومات ببعض .

#افهم_جسمك
#فورمة_العلوم
الجزء الأول : قصة #الفوسفاتاية_المتطلقة
كتير مننا كانوا بيكرهوا العلوم فى المدرسة .. والعيب مش في العلوم .. العيب فى طريقة توصيل المعلومة .. وعشان كده أنا هجرب أكتب مقالات تخليك تحب العلوم .. أو اللي يخصنا منها ..أو ده اللي هحاول أعمله ..
وطالما هنتكلم فى العلوم فأحب أنبه إن تخصصي محاسبة يعني بلاش تقرا أحسن .. أنا نبهتك وانت حر .. بس بيني وبينكم ده له ميزة .. إني هتكلم فى العلوم فى مستوى القاريء الضايع زيي .. يعني هنتكلم بالبلدي ....

بص يا سيدي .. جسمك بيحتاج لطاقة.. عشان أجهزة جسمك أصلا تشتغل .. قلبك يضخ الدم .. معدتك تهضم الأكل .. رئتك تسحب أكسجين وتخرج فضلات زي ثاني اكسيد الكربون .. عضلاتك تنقبض وتقدر ترفع أوزانك .. عشان تقدر تمارس أنشطة .. زي إنك تجري أو تمشي أو تشتغل أو حتى لو قاعد تقرا المقال ده دلوقتي .. فهتحتاج لطاقة.

ومن العجيب إن جسمك مبيتعاملش غير مع نوع معين من الطاقة
أنا هنا مبتكلمش عن مصادر الطاقة البسيطة زي (الجلوكوز - الأحماض الدهنية - الأحماض الأمينية ) ، واللي خلاص جسمك قدر يستخلصها من أكلك للـ (نشويات والدهون والبروتين) .
بشكل ما الـ 3 أشكال البسيطة دي .. بيتحولوا تاني كلهم لصورة واحدة أبسط منهم .. ألا وهي (عملة الطاقة ATP) .. أو (أدينوسين ثلاثي الفوسفات Adenosine Tri Phosphate)..

== هو ده اللي هتتكلم بالبلدي ؟
- اتقل ع الرز .. يتحرق ...

يعني عشان تمارس أي نشاط سواء بتقرا أو بتعمل مجهود بيخلي عضلاتك تنقبض ..
فجسمك بيحتاج الـ ATP.. واللي جسمك بيعرف يطلعه زي ما قولنا بطريقة ما (من أكلك) .. وهو عملة الطاقة فى الجسم .. لأنه بالنسبة لجسمك عبارة عن عملة بيقدر يصرفها .. زي الدولار مثلا فى أمريكا .. فلو ربنا حققلك حلمك وسافرت أمريكا عشان تشتري لب وترمس من على كورنيش أمريكا العمومي .. هي دي أمريكا ولا ده النت؟
المهم قررت تتفزلك وتستخدم عملتك المحلية (الجنيه المصري) .. فبتاع اللب ف الغالب رد فعله انه هيلف الجنيه بتاعك ويعمله قراطيس .. لأن عملتك بالنسباله مجرد ورق ملون .. وهو مبيفهمش غير قيمة الورقة الخضرا اللي اسمها (دولار) ..

نفس الحكاية جسمك مبيفهمش غير عملة واحدة بيعرف يطلع منها (طاقة أو سعرات حرارية) اسمها (أدينوسين ثلاثي الفوسفات) .

مش فاهم يعني ايه علاقة مركب كيميائي زي ده بالطاقة بالطاقة ؟
لما بنكسر المركب بيطلع طاقة .. وعشان تقدر تتخيل الكلام ده بمثال من حياتك العملية .. أحيانا لما تحاول تكسر حاجة معدن وتمسك مكان الكسر بتلاقي سخونية .. والسخونية دي عبارة عن طاقة حرارية نتيجة التكسير .. ودي حاجة منطقية عادي يعني تقدر تستخدم معاها الحالة الصفرية لقاعدة If .. ولو مش عارفها مش مهم عشان مش موضوعنا.
المهم إن الـ ATP ده فيه 3 روابط فوسفات .. مهو أسمه (أدينوسين ثلاثي الفوسفات) .. فلما تكسر واحدة فوسفات من الـ التلاتة .. بيطلع طاقة رهيبة (من 7 لـ 12 سعر حراري كبير) من جزيء واحد. ويبقى اسمه ويا للعجب والغرابة بعد ما نشيل فوسفاتيه واحدة من التلاته (أدينوسين ثنائي الفوسفات ) ^^

تعالى بقى للكبيرة : فاكر لما قريت مقال قبل كده عن مكمل الكرياتين ؟ وبعد ما قريت مفهمتش هو بتاع ايه برضو؟
الكرياتين اللي انت بتاخده بيتخزن فى العضلات فى صورة (فسفوكرياتين) .. ايه؟ لحظة واحدة بس ؟
فسفو دي اللي هي جاية من فوسفات مثلا ؟
اه مهو عشان كده بيقدر يرجع فوسفاتيه لـ (أدينوسين ثنائي الفوسفات ADP) .. فتتحول تاني لـ ATP.. فتحس أنك بتعرف تجيب تكرارات أكتر وتعبك قل فى التمرين لأن الطاقة بقت متجدده .. كل ما تخسر فوسفاتيه كرياتينك يرجعها .
اقولك على سر .. لو مهتم بتغذيتك بتلاقي كميات كويسة فى اللحوم والبروتينات الحيوانية ومش مهم تاخده من مكمل أصلا .. إلا لو عندك حجم عضلي كبير جدا جدا ومبتعرفش تاخد كمية البروتين اللي جسمك محتاجها فى اليوم من الأكل.
اقولك على سر تاني؟ .. دي مش الطريقة الوحيدة اللي ممكن نرجع بيها الفوسفتاية اللي كل شوية نكسرها ونديها شلوط .

مش عارف ليه تحس الموضوع بقى عامل زي شخصية أحمد حلمي فى فيلم ألف مبروك .. كل لحظة بيتكرر بنفس الطريقة .. وجسمك دايما وأبدا بيكرر اللي بيعمله لما الـ ATP بيبقى ADP فبيرجعه تاني لـ ATP عشان يعرف يكسره ويطلع طاقة وهكذا دواليك دواليك دواليك.. ومين متبهدل معانا فى الليلة دي غير الفوسفتاية الغلبانة ؟ انت فاكرها ايه ملهاش كرامة ؟
هي فى الواقع ملهاش كرامة وانت بتاع مصلحتك .. عشان هي على طول بترجع وانت على طول بتطردها عشان تطلع طاقة منها

وتستمر الدايرة دي طول ما انت محتاج لطاقة .. وانت على طول محتاجها اصلا طالما عايش.. المهم لو محتاج طاقة من ثلاثي لثنائي بتحصل بكسر الفوسفاتيه ...
لكن من ( ثنائيADP ) لـ ( ثلاثيATP ) .. أو ( تخليق الـ ATP ) أو إنك ترجع الفوسفتاية .. فده بيحصل بـ طريقتين .. والسبب ..
إن جسمك بيعمل التحويلة دي في وقت معين .. فلو مجهودك مناسب للوقت اللي هتتحول فيه .. خير وبركة ..
أما لو مجهودك بيحتاج لطاقة أسرع من الوقت اللي بيحتاجه الجسم فى الوضع العادي عشان يحول الثنائي لثلاثي.. فالجسم بيستخدم طرق بديلة .. عشان تقدر تطلع طاقة فى وقت مناسب ..

هبسطهالك :: تخيل معايا إن ( الثنائي = ADP ) بيمثل حلوان ، وإن (الثلاثي = ATP) بيمثل المرج ..
الوضع العادي إنك بتحتاج توصل الساعة 9 شغلك .. فبتنزل 8 عشان عارف ان المترو هياخد ساعة .
طيب ايه رأيك لو على غير العادة صحيت من نومك 8.30 ومبقاش قدامك إلا نص ساعة بس عشان توصل من حلوان للمرج بشكل ؟ .. لأ الطريقة اللي اسمها المترو معادتش نافعة .. شوفلنا ميكروباص الدائري .. المهم حاجة أسرع عشان لازم نوصل فى الميعاد .

نفس الكلام .. عندنا طرق مختلفة عشان جسمنا يعيد تخليق الـ ATP .. لكن كل طريقة بتكون حسب نوع النشاط (حسب مدة تمرينك وقوته) وده بالمناسبة اللي خلانا نقدر نفرق بين أنواع التمارين (هوائي زي تمارين الكارديو .. ولا لاهوائي زي تمارين الحديد)؟
يعني الخلاصة : زي ما كان عندنا مترو هيوصلنا فى ساعة وميكروباص هيوصلنا فى وقت أقل .. فعندنا طريقة هوائية وطريقة لاهوائية واحدة فيهم سريعة عن التانية عشان جسمنا يقدر يكون الـ ATP فى وقت مناسب حسب سرعة وقوة التمرين لو كان عنيف زي الحديد أو لو كان زي الكارديو .
وزي ما المترو والميكروباص بيستخدموا مصادر طاقة مختلفة واحد كهربا والتاني سولار.. نفس الحكاية الطريقة الهوائية واللاهوائية هتلاقي واحدة اعتمادها ع الدهون والتانية اعتمادها ع الجلوكوز .

بس هوقف هنا .. لأنها هتكون بداية كويسة نقدر نبدأ منها فى الجزء التاني
واللي هنتكلم فيه عن مقارنة بين المسارات او الطرق التلاته ازاي بترجع الفوسفاتاية المطرودة .. وعلاقة الليلة دي بالتمرين حرق الدهون و حرق الجلوكوز والجلايكوجين اللي فى العضلات ..

الموضوع ده هتلاقيه تحت عنوان (التنفس الخلوي - Cellular respiration ) لو حبيت تقرأ عنه بطريقة أكاديمية .. .
#افهم_جسمك
#فورمة_العلوم الجزء الأول #الفوسفاتاية_المتطلقة
#YALLA_TRANSFORM

https://www.facebook.com/Ahmed3dzone/posts/1484200081625951