فوائد العسل الأبيض

السلام عليكم
العسل الأبيض فيه شفاء للناس .. إزاي ؟
كنت بستغرب أوي زمان لما كنت بشوف مكونات العسل .. المعلقة كبيرة من العسل مثلا (21 جرام عسل) فيها 64 كالوري و 17 جرام سكر .. يعني 81% من وزنه سكر .
وده يوضح قد ايه هو عبارة عن (مادة مركزة بالسكر) .. وطبعا مفيش دهون .. وحتى بالنسبة للأحماض الأمينية والفيتامينات والمعادن والألياف فيه نسبتها لا تذكر (0) .. لدرجة أنها متأثرش فى احتياجاك اليومي الا لو ناوي تاخد ألاف السعرات الحرارية منه .
-=-=-=-=-=-=-=-
لما هو مفيهوش عناصر غذائية .. أومال ايه قصة "فيه شفاء للناس" دي ؟
بص يا سيدي .. السكريات اصلا بتحب المياة .. بتمتصها .. لما يكون السكر كتير فى مادة معينة زي العسل .... فده بيدي للعسل القدرة انه يسحب المياة من أي حاجة .. حتى لو كانت الحاجة دي زي الـ (بيكتيريا او فطريات أو أي كائنات دقيقة) .. بمجرد ما العسل يتحط عليها يبدأ يشفط المياة منها .. وينشفها لحد ما تموت .
-=-=-=-=-=-=-=-
طب ده يفيدنا فى ايه يعني ؟
عمرك سألت نفسك ليه لما بيحبوا يحفظوا الفاكهة على التورتة بيغلفوها عسل عشان متحمضش بسرعة ! .. ايوة غير انه لما بيغلفها وبيقلل تعريضها للهوا فهو مكانش هينجح فى المهمة دي إلا لو كان هو نفسه وسيلة لقتل البيكتيريا .. يعني الموضوع له علاقة بالتطهير.. والعلاقة دي بتظهر مع حاجات اهم لو استخدمناه موضعيا .. فى الحالات دي :
- مع الحروق والجروح (1) ..
- مع قرح مرض السكري .. " قرح بتوصل المرضى لبتر أطرافهم" (2) ..
- وده اللي الدراسات وجدت فعلا انه حققه لدرجة نسبة الشفاء ممكن توصل لـ 97% (3).
- مع الصدفية .. لكن الموضوع محتاج دراسات أكتر (4)
- مع البواسير بخلط العسل مع شمع النحل وزيت الزيتون (5)
-=-=-=-=-=-=-=-
طب ما دي حاجة ممكن يعملها أي نوع سكر طالما كل السكريات بتحب المياة ؟
فعلا الاستنتاج إن أي سكر حتى لو سكر شاي هيقوم بنفس المهمة ويقتل الميكروبات استنتاج سليم (ف لو معندكش عسل تحطه على الجرح حط سكر)..
- لكن الدراسة دي اتكلمت عن إن العسل فعال أكتر (6)
-=-=-=-=-=-=-=-
معلش لكن لو كان التطهير بالشكل ده هو سبب ذكر "فيه شفاء للناس" كان هيبقى الموضوع فاكس طالما السكر ممكن يقوم بنفس الغرض .. لكن العجيب إن العسل اصلا بيجتمع فيه اكثر من خاصية تانية تساعد على الشفاء .. وده اللي هنتكلم عنه الأجزاء اللي جاية من سلسلة #فيه_شفاء_للناس #العسل_الجزء_الأول
-=-=-=-=-=-=-=-
الدراسات والمصادر..
مترقمة حسب الترتيب اللي ظهرت بيه في المقال :
http://nutritiondata.self.com/facts/sweets/5568/2 (0)
https://www.ncbi.nlm.nih.gov/pubmed/25742878 (1)
https://www.ncbi.nlm.nih.gov/pmc/articles/PMC4216698 (2)
https://www.ncbi.nlm.nih.gov/pubmed/22985336 (3)
https://www.ncbi.nlm.nih.gov/pmc/articles/PMC4012670/ (4)
https://www.ncbi.nlm.nih.gov/pubmed/17369999 (5)
https://www.ncbi.nlm.nih.gov/pubmed/17708384 (6)
-=-=-=-=-=-=-=-
https://www.facebook.com/YallaTransform/posts/1742765899142954
Yalla Transform
Ahmed Adel

 

أكبر هبده اتهبدت فى تاريخ العسل .. إن العسل هو "بيبي" النحلة .. أومال العسل ده بيجي منين ؟

طبعا احنا عارفين إن شغالات النحل مهمتها تجمع ( الرحيق أو الـ nectar ) ، الرحيق ده لو النحلة هتتغذى عليه هيروح للجهاز الهضمي .. وفى الحالة دي الفضلات اللي بتخرج مبتكونش عسل بتكون فضلات .. طالما راح للجهاز الهضمي .

لكن اللي بيحصل إنه بيتم تخزين الرحيق في بطن النحلة فى كيس خاص بالعسل بس ! الكيس ده أشبه بمصنع كيماوي معقم (حرفيا).. بيتم فيه خلط الرحيق بمواد وانزيمات مختلفة عشان تحوله لعسل وعشان تعقمه فى نفس الوقت ..

المهم فى النهاية على ما بتوصل شغالات النحل للخلية بتطلع العسل من الكيس عن طريق خرطوم عند فكيها عشان تحط العسل فى الخلايا السداسية وتبخر المياة منه عن طريق رفرفة جناحها وأخيرا تغلفها بالشمع لحفظه.
-=-=-=-=-=-=-=-
ايه حكاية التعقيم اللي بيحصل ده وإزاي بيفيدنا كبشر ؟
ف أثناء امتصاص النحلة للرحيق .. بلعومها فيه غدد بتفرز منه ع الرحيق إنزيم اسمه Glucose Oxidase .. الانزيم ده هدفه ( التعقيم ) .. وبيعمل ده من خلال حاجتين :
- بيحول الجلوكوز .. لحمض مركز جدا اسمه (Gluconic acid) ..
- الإنزيم بيتفاعل على سطح العسل مع الاكسجين الجوي وبينتج (مياة اكسجين H2O2) زي اللي بتتباع فى الصيدليات لتطهير الجروح (1).

وجدوا بقى إن تركيز (مياة اكسجين H2O2) اللي فى العسل بيعمل حاجتين :
- بيمنع تكاثر البيكتريا مهما كان العسل مخفف وعليه مياة التأثير ده بيحصل (2)
- مش بس كده لأ في 2011 وجدوا إنه كمان بيشتغل على تدمير الحمض النووي للبكتيريا (3)

لكن وجدوا إن مستوى الـ (H2O2) بيتأثر بالتعرض للضوء والحرارة الزيادة (4)
وعشان كده لو بصينا للنحل وهو بيغلف العسل بالشمع (فده لأن الشمع مادة معتمه) هتمنع وصول الضوء للعسل .. فلما تيجي تشتري العسل المعروض فى عبوات شفافة وبالتالي الضوء بيوصلها بسهولة .. ده معناه انك بتعمل حاجة عكس اللي النحل بيعمله وبتقلل من فايدة العسل .. فإما تشتروه من مناحل أو تشتروه فى محفوظ فى عبوات معتمه فى درجة حرارة قليلة .

كمان فيه بروتين مناعي اسمه Bee Defensin-1 (5) .. اجسام النحل بتفرزه عشان تقدر تزود مناعتها .. لكن طبعا بينزل مع العسل وناكله ونستفيد احنا كمان منه فى تعزيز قتل الميكروبات .

نرجع تاني لفكرة إنك بتاكل حاجة معقمة جدا (العسل مش بيبي) .. العسل بيتم خلطه بوسائل حماية خلقها ربنا فى جسم النحلة وبلعومها .. بتفتك من خلاله بالميكروبات والبيكتيريا عشان يتم حفظه بدون ما يفسد .. وده فى حد ذاته بيخلي العسل يحتوي على antibiotic او مضاد حيوى قوي جدا .. سواء بالأكل أو بوضعه موضعيا على الجروح !

مش بس كده .. لو سمعت عن موضوع البيكتيريا اللي بتقاوم المضادات الحيوية .. اللي ظهرت مع استهلاكنا المفرط للمضادات الحيوية مع كل دور برد .. ده خلق للبيكتيريا مناعة من المضادات الحيوية وبقت تنقل المناعة اللي حصلت لها دي للأجيال اللي بعدها .. (عشان تتخيل المشكلة خلينا نقول إن لو مسكنا نوع واحد بس من البيكتيريا المقاومة .. وجدوا إنها بتتسبب فى قتل عدد أكبر من العدد اللي بيموت من بسبب أربع أمراض مع بعض .. الإيدز والشلل الرعاش وانتفاخ الرئة والانتحار) ، وللأسف مبقاش عندنا قدرة ننتج مضادات حيوية جديدة تحارب البيكتيريا المقاومة .. العسل بقى وجدوا إن له القدرة يقتل البكتيريا المقاومة للمضادات الحيوية (6) !
-=-=-=-=-=-=-=-
بعد ما اتكلمنا على أكتر الحاجات اللي بتخلي العسل #فيه_شفاء_للناس .. البوست اللي جاي هتكلم عن حاجة كمان بتعزز من دوره العام للشفاء وإن مكانتش من نقاط قوته لكن اجتماعها مع كل اللي اتقال بتخليه فعلا يستحق اللقب. استنوا الموضوع اللي جاي .
-=-=-=-=-=-=-=-
المصادر والدراسات مترقمة حسب الترتيب اللي ظهرت بيه في المقال :
https://www.ncbi.nlm.nih.gov/pubmed/24969731 (1)
http://www.nrcresearchpress.com/doi/10.1139/w06-086#.Ww1ECkiFO9I (2)
https://bmccomplementalternmed.biomedcentral.com/articles/10.1186/1472-6882-13-129 (3)
https://www.sciencedirect.com/science/article/pii/0926656963901081?via=ihub (4)
https://www.ncbi.nlm.nih.gov/pubmed/20228250?dopt=AbstractPlus&otool=inluvalib (5)
https://academic.oup.com/cid/article/46/11/1677/374749 (6)

-=-=-=-=-=-=-=-
https://www.facebook.com/YallaTransform/posts/1750473165038894
Yalla Transform
Ahmed Adel

 

العسل #الجزء_الأخير
هل فى علاقة بين العسل والسرطان ؟
عشان نقدر نجاوب على النقطة دي محتاجين نشرح مصطلح اسمه (أكسدة الخلايا).

-=-=-=-=-=-=-=-=-=-
ايه هي الأكسدة ؟
باختصار .. أكسدة الخلايا .. يعني حاجة بتحصل للخلايا بتسبب تلفها، وده راجع لحاجة واحدة بأسامي كتير ، ألا وهي (المؤكسدات - الشوارد الحرة - الجذور الحرة - الـ free radicals ) ..
بالبلدي الـ free radicals ممكن تتعامل معاه على انه (حرامي إلكترونات) بيسرقها من ذرات خلايا حضرتك .. وبيعمل كده عشان الحرامي ده فى حد ذاته بيكون ذره ناقص لها إلكترون .. فبيدخل على أي خلية (أو حتى الـ DNA) ياخد منهم إلكترون ويسيبهم من غير إلكترون .
طبعا كل ذرة يتاخد منها إلكترون تروح تسرقه من الذرة اللي جنبها ..وده بينتج عنه سلسلة متتالية من الجذور الحرة (حرامية إلكترونات)، والسلسلة دي ممكن توصل لـ 6.023 x 1021 بليون تفاعل في الثانية! وده بيسبب عدم استقرار الخلية ويغير شكل الأنسجة الحية ويخليها مش نافعة .
وهنا بيحصل المرض المعروف بالكانسر أو السرطان .. والشيخوخة وظهور التجاعيد .. والزهايمر .
-=-=-=-=-=-=-=-=-=-
لأ فهمني .. المؤكسدات أو الـ free radicals اللي بتسبب تلف الخلايا.. بتيجي منين اصلا ؟
عندنا 3 حالات ممكن تتسبب فى وجود حرامية الالكترونات (أو الـ free radicals) :
- إما بتحصل بشكل طبيعي :
أثناء عملية البناء والهدم (وجسمك بيحول الأكل لطاقة).
- أو جسمك بينتجها بنفسه :
خلال المرض - التوتر - حدوث الالتهابات - التقدم بالعمر.
- أو بتجيله من بره :
المعادن السامة – الكحول – السجائر - الإشعاعات النووية - الأشعة فوق البنفسجية - والمخلفات الكيميائية للمصانع - استخدام زيت القلي أكتر من مرة (الطعمية ومصانع الشبسي) .
-=-=-=-=-=-=-=-=-=-
يعني ايه ؟ هي حلوة ولا وحشة ؟
- المؤكسدات أو الـ free radicals للأسف .. الناس فاهماها غلط .. يمكن عشان المخرجين حصروها في ادوار الشر لكن هي في الحقيقة (حرامي إلكترونات) طيب .. زي طيبة كمال ابو رية و محمود الجندي !

- لإن جسمك أصلا بيستغل الشوارد الحرة وأحيانا بينتجها عشان يدمر خلايا أعداءك .. زي (البكتيريا والفيروسات - التخلص من السموم - التحكم بالالتهابات ) .. (دراسة 1) .. يعني هي حلوة فى الحدود الطبيعية ..

- أما لو زادت .. بزيادة تعريض جسمك لـ (توتر - كحول - سجائر - شمس - أكل فيه كيماويات - زيت اتسخن اكتر من مرة ) .. وكمان بعد كل المصايب دي مبتدخلش كمان مضادات أكسدة (بسبب سوء التغذية).. فيحصل حاجة بيسموها (الإجهاد التأكسدي oxidative stress ) أو اختلال فى التوازن بينهم بحيث تزيد الشوارد الحرة عن مضادات الأكسدة.
-=-=-=-=-=-=-=-=-=-
تطلع ايه مضادات الأكسدة دي كمان ؟
باختصار من اسمها هي حاجة بتتغلب على الأكسدة .. بتروح للحرامي بتاعنا وتديله إلكترون من عندها عشان يسيب الخلايا فى حالها .. فتقلل من حرامية الإلكترونات .. وترجع التوازن للجسم .. ويفرح المشاهدون جميعا .
-=-=-=-=-=-=-=-=-=-
مضادات الأكسدة موجودة فين ؟
خلينا ناخد الموضوع واحدة واحدة :
▪️- فى انزيمات جسمك بيصنعها.. بتحارب التأكسد .. بس عشان جسمك يصنعها لازم تدخله معادن زي .. الحديد والنحاس والسيلينيوم والمغنيسيوم والزنك (بالنسب المعروفة لكل عنصر). ودول موجودين فى اللحوم بأنواعها والكبده والبيض .
▪️- أي أكل فيه فيتامينات A و C و E و B9 .. يعني مثلا .. الجزر والفلفل بألوانه والمكسرات والبقوليات .. بيكون فيه مضادات أكسدة .
▪️- فى النباتات عموما بتاخد منها مضاد أكسدة زي .. Carotenoids – Flavonoids - Allyl sulfides – Polyphenols – anthocyanins – Catechins - Lutein .. إلخ، ودول موجودين فى كل الفواكه والخضار والشاي والكاكو والقهوة وأي حاجة بتتزرع عموما حسب النوع .
ملحوظة : مينفعش تعتمد على نوع واحد من مضادات الأكسدة لإن كل نوع متخصص لنوع مختلف من الشوارد الحرة .. لذلك لازم يكون النظام الغذائي متنوع .
-=-=-=-=-=-=-=-=-=-
العسل بقى علاقته ايه بالموضوع ده ؟
بص يا كبير عشان نقيس كمية مضادات الأكسدة في أكل معين بنلجأ لحاجة اسمها .. ORAC values ..
مثلا : الـ ORAC value للعسل 130 وحدة μ mol TE/100g .. والطماطم 387 وحدة μ mol TE/100g .. والشاي الأخضر 1253 وحدة μ mol TE/100g .. جميل .

جسمك بيحتاج من 3000 لـ 5000 وحدة من مضادات الأكسدة فى اليوم .. قلنا الـ 100 جرام عسل فيهم 130 وحدة .. يبقى معلقة العسل الكبيرة فيها كمتوسط 21 وحدة بس من مضادات الأكسدة .. شوفت ضعيفة إزاي ؟

كذلك الشاي الأخضر بعكس الشائع عن كمية مضادات الأكسدة اللي فيه، لإن عمرك ما هتاخد 100 جرام مقارنة بالفواكه والخضار..

لكن الفكرة بشكل عام .. إن النحل لما بيتغذى على رحيق أكتر من زهرة بيجمع أكتر من نوع مضاد للأكسدة .. وقدرة العسل المضادة للأكسدة بتكون نتيجة اشتراك مجموعة المركبات زي الفينولات ، الببتيدات ، الأحماض العضوية ، الإنزيمات ، الفلافونويد ، ومكونات ثانوية تانية .. والمزيج ده هو اللي بيدي للعسل قوته المضادة للأكسدة (دراسة 2)

يعني تغذية النحل على رحيق الزهور.. هو ده اللي بيزود مضادات أكسدة فى العسل .. مش تغذيته على السكر .. يعني لازم يكون عسل عالي الجودة .. وأكتر عسل عالى الجودة فيه مضادات أكسدة هو العسل الغامق ( عسل الحنطة السوداء أو العسل البري أو الـ Buckwheat Honey ) .. دراسة (3) .. ودول دراستان لقوا إن عسل الحنطة السوداء بيزود من قيمة مضادات الأكسدة في الدم :
▪️- الأولى وجدت إن عسل Buckwheat فى المياة رفع الـ ORAC لـ 7% مقارنة بالشاي (دراسة 4)
▪️- والتانية لقوا إن الانسان بيستخدم كمتوسط كمية التحلية بتقدر بـ 70 كيلو ف السنة ، فلما تحط العسل مكان المحليات التقليدية ده ممكن يعزز مضادات الأكسدة ف جسمك (دراسة 5)

ويبقى فايدة العسل أو أي مضاد للأكسدة :
هي الحماية من أي مرض ناتج عن الجذور الحرة ..
زي السرطان والشيخوخة وأو أمراض متعلقة بالجهاز العصبي والاكتئاب والزهايمر (دراسة 6).
-=-=-=-=-=-=-=-=-=-
الخلاصة :
- (أكسدة الخلايا = تلفها) ... التلف بيتم عن طريق (مؤكسدات = حرامية إلكترونات).. والحل فى (مضادات للأكسدة = الخضار والفاكهة).

- العسل مش نقطة قوته فى إنه مضاد للأكسدة .. لضعف الكمية اللي هتقدر تاخدها منه يوميا .. وخصوصا لو مقدرتش تجيب عسل عالي الجودة زي (عسل الحنطة السوداء) ، لكن فى العموم بحسب متوسط كمية التحلية خلال السنة لو اعتمدت عليه هيكون كمية مضادات الأكسدة اللي دخلت جسمك أفضل من التحلية بالسكر العادي .

لكن كون إن كل النقط اللي اتذكرت دي فى منتج واحد "العسل" .. فده بيخلي العسل يستحق لقب #فيه_شفاء_للناس وبجدارة ..
-=-=-=-=-=-=-=-=-=-
المصادر :
http://www.bloodjournal.org/content/92/9/3007?sso-checked=true (1)
https://www.ncbi.nlm.nih.gov/pubmed/12358452 (2)
https://www.ncbi.nlm.nih.gov/pubmed/11982440 (3)
https://pubs.acs.org/doi/abs/10.1021/jf025897t (4)
https://pubs.acs.org/doi/abs/10.1021/jf025928k (5)
https://www.ncbi.nlm.nih.gov/pmc/articles/PMC3005390/ (6)
-=-=-=-=-=-=-=-=-=-
https://www.facebook.com/YallaTransform/posts/1751102264975984
Yalla Transform
Ahmed Adel

 

حبيبي يا كابتن محمد .. ربنا يكرمك بالخير يارب .

 

والنعمة يااحمد انت عسل ابيض اصلي مش مغشوش
جزاك الله خيرا واحسن ثوابك