لبن السرسوب Colostrum .. ما هو؟ وما علاقته بالرياضيين ؟

السلام عليكم ..
لبن السرسوب
متتخضش من الاسم .. احنا كمصريين بنسميه كده لكن هو اسمه الـ Colostrum .. أو الحليب الأولي .. باختصار هو أول (حليب) بيخرج من ثدي الأم بعد الولادة (أول أربع أيام رضاعة) أو أحيانا بيظهر قبل الولادة .
-=-=-=-=-=-=-=-=-
ايه الفرق بين (لبن السرسوب Colostrum) و (لبن الرضاعة العادي Mature Milk) ؟
▪️- بيكون أغني بالبروتينات ، لدرجة بتخليه ملمسه عالي اللزوجة فبيتدفق من الثدي ببطأ فيقدر الطفل يتعلم الرضاعة فى الأيام الأولى.
▪️- فقير بالدهون والكازيين (عشان يناسب الجهاز الهضمي للجنين اللي مبيتحملش حاجات تقيلة زي دي)
▪️- مضاد للبكتريا فيه اجسام مضادة تحافظ ع مناعة الجنين وتقيه من الأمراض (البيبي أول ما بيتولد مانعته بتكون ضعيفه)
▪️- بيسهل خروج الفضلات وبينظف الأمعاء.
بعد 3 – 4 أيام من الرضاعة يبدأ لبن السرسوب يتحول إلى مرحلة تانية من اللبن واللي اسمه (لبن انتقالي Transitional Milk) وبيستمر لمدة 10 أيام لغاية ما يتحول (للبن الناضج Mature Milk) اللي يعتبر المرحلة النهائية في تكوين لبن الأم.
-=-=-=-=-=-=-=-=-
ايه دخل (لبن السرسوب) بالرياضيين؟
نتيجة لمميزات اللبن .. راحوا يشوفوا يقدروا يجيبوه منين وهنا كان دور (الحليب الأولي للبقر/ اللبأ البقري / Bovine colostrum).. وعملوا عليه أبحاث ووجدوا التالي:
✅- بيزود بناء الكتلة العضلية زي أو أعلى من الواي بروتين
⬅️ الدليل: دراسة 2001 .. اتنشرت فى Nutrition جرنال
كان في مجموعتين: (مجموعة بروتين مصل اللبن) و(مجموعة الحليب الأولي للبقر). المجموعتين شاركوا في تمارين المقاومة 3 مرات في الأسبوع لمدة 8 أسابيع.. وفي نهاية الدراسة وجدوا إن مجموعة اللبأ البقري عندها زيادة أكبر في كتلة اللادهنية عن مجموعة بروتين مصل اللبن.
https://www.ncbi.nlm.nih.gov/pubmed/11312068
✅- بيحسن الاستشفاء بعد التمارين عالية الكثافة.
⬅️ دراسة 2009 اتنشرت فى Sports Medicine جرنال
https://www.ncbi.nlm.nih.gov/pubmed/19902984
ودراسة اتنشرت سنة 2002 فى science and medicine in sport جرنال
https://www.jsams.org/article/S1440-2440(02)80028-7/abstract
✅- بتزود من عوامل النمو الشبيهة بهرمون الانسولين زي الـ IGF-1
⬅️ودي الدراسة اللي بتتكلم عن الموضوع ده
https://www.physiology.org/doi/abs/10.1152/japplphysiol.00002.2002
✅- بالإضافة لغناه بالفيتامينات عن الحليب العادي وإنه أقل من الحليب العادي فى الدهون.
✅- كمان بيحسن الجهاز المناعي .. لأنه مضاد للميكروبات وفيه عوامل نمو.
✅- وبيحسن صحة الجهاز الهضمي.
لكن ومع ذلك برضو مفيش أبحاث كفاية تأكد أي حاجة من الفوايد اللي تم ذكرها .. لكن الأبحاث المؤكدة دلوقتي على حاجات بعيد عن الرياضة .. زي استخدامه مع الأنفلونزا ومع الأسهال لمرضى الإيدز وإسهال الأطفال.
باختصار عامل اللبأ البقري معاملة البروتين الحيواني متعتبرش إن له ميزة إضافية لحد ما يتعمل دراسات كفاية .
-=-=-=-=-=-=-=-=-
الاعراض الجانبية ؟
لو عندك حساسية اللاكتوز .. فهيكون زيه زي أي منتج من منتجات الألبان.
وهو آمن بشكل عام، لكن مفيش معلومات كافية موثوق منها من مدى سلامة تناول اللبأ البقري للحامل أو المرضع.
-=-=-=-=-=-=-=-=-
الجرعات ؟
بتختلف الجرعات على حسب انت هتاخده ليه، لكن لو هتاخده كبروتين فمن 25 لـ 60 جرام في اليوم ..والجرعة دي وجدوا انها ممكن تحسن الأداء بزيادة 5% https://goo.gl/NZzQ6M
مع العلم إن الـ 100 جرام من المكمل المجفف .. فيه 500 كالوري و 33 جرام بروتين بس.
لو بصيت بقى ع علبة المكمل من شركة Now مثلا هتلاقيها كلها أصلا هتلاقيها 85 جرام بس.. وده معناه إنها هتخلص فى جرعة وهيفيض حبة .. ااااااه يعني ملهوش لازمة المكمل ده ؟ شكلك فاهم يا نصة .. لو حد سألك عنه قوله ميحطش فيه فلوس .

لو عاوز تتابع كل جديد تقدر تتابع صفحتي ع اللينك ده :
https://www.facebook.com/YallaTransform
|
YallaTransform
Ahmed Adel

 

برأيك السرسوب الصافي الطبيعي ١٠٠ غرام كم سعرة
انت ذكرت المكمل ولكن كيف علي ان اعرف لبن السرسوب الطبيعي يحوي على سعرات وبروتين