مدي امكانية اصلاح الانزلاق الفقاري بتمارين الحديد

السلام عليكم
ممكن رايك يا كابتن في حالة انزلاق فقاري L5-S1 زائد غضروف صغير في مكان تاني هل ممكن اصلاحها بتمارين الحديد و علشان الاراء متعددة ما بين دكاترة عظام مانعين الحديد نهائي و ما بين علاج طبيعي سامح بتمارين حديد معينة و ما بين كباتن التدريب ينصحو بتمارين تانية خالص
و في الاخر مفيش حد منهم متفق علي فائدة الحديد او حتي متفقين علي التمارين المفيدة و المضرة للحالة

اللي فات دة كان الملخص

الموضوع باختصار انا كنت سمين جدا جدا تقريبا 200 كجم و بعد رجيم قاسي و مرض و تعب عضوي تم نزول الوزن و اكتشاف حالة الانزلاق الفقاري و للاسف فاضل الدهون العنيدة اسفل البطن اللي طبعا معاها ترهل لا باس بة للجلد و علشان كدة فكرت اني انزل وزني ل 60 كجم لضمان التخلص من الدهون و ابدا مرحلة رفع الوزن عضلات و ليس دهون و لكني اصطدمت بحالة الانزلاق الفقاري و التحذير من الحديد و جالي احباط رهيب
فهل يا تري ممكن الحديد يساعد في الحالة مع العلم اني نظامي الغذائي كيتو دايت وجبة واحدة في اليوم لا تتعدي ال 1000 سعر
اسف علي الاطالة

 

شكرا جزيلا للرد
انا شوفت التمارين في علاج الديسك بس اللي عندي مش ديسك الي عندي فقره متحركة من مكانها و هي رقم 5 علي السكرم S1 اسمها spondylolyesthesis تقريبا و الفقره منزلقه ناحية البطن علشان كدة تمارين الديسك ممكن تزود انزلاق الفقرة خصوصا التمارين اللي فيها ثني الظهر للخلف
و فعلا بعض الدكاترة قاللي عملية تثبيت بشرائح و مسامير بس طبعا ده مقلقني و خصوصا ان كتير بيقولو مفيش حد يعمل عملية في العمود الفقري الا لو مش قادر ينام من الالم او لا قدر الله مش عارف يمشي
و دكاترة علاج طبيعي نصحوني بتقوية عضلات البطن بالذات و القطنية علشان تحافظ علي الفقرة من انها تنزلق اكتر من كدة
بس المشكلة هو الاختلاف في نوع التمارين دي بمعني تمرين معين دكتور يقول علية مفيد لحالتي و دكتور تاني يعترض و يقول التمرين ده يضرك اكتر خصوصا في تمارين الحديد

 

شكرا جزيلا للرد و الاهتمام
العمود الفقري يتكون من مجموعه من الفقرات المتصله ببعضها البعض عن طريق عظام صغيره في تراص متناسق فوق بعضها البعض و بين كل فقره و الاخري يوجد سائل ( الديسك )
في بعض الحالات و نتيجة بعض العوامل يحدث شرخ في العظام الصغيره الرابطه للفقرات مما يؤدي الي تحرك الفقره نفسها الي الامام او الخلف مما يؤدي ايضا الي الضغط علي الديسك و حدوث انزلاق كنتيجة لانزلاق الفقره
;كما تري في الصورة السهم يشير الي تحرك الفقرة الخامسة فوق السكرم ( الطبيعي ان تكون الفقره في نفس التناسق مع كامل العمود الفقري)
صوره اكثر وضوحا و لكن الفقره الرابعه هي المنزلقه علي الفقره الخامسه
علشان كده مش كل التمرينات تنفع في الحاله دي سواء تمرينات حديد او سويدي
اسف علي الاطاله

 

شكرا جزيلا لوقتك و لامانتك و صدقك
جزاك الله خيرا و وفقك في عملك

 

السلام عليكم

كنت حابب اعلق علي موضوع ان (بعض الدكاترة قاللي عملية تثبيت بشرائح و مسامير)
لعاية 2015 كان ده الحل المتاح بالنسبه للانزلاق الفقاري و الانزلاق الغضروفي اما الغضروف بيكون طلع من تحت الفقره بنسبه كبيره وكانت المشكله هنا انك حتفقد جزء من مرونه العمود الفقري و حتزود الحمل علي ال الفقره العلويه بصوره اكبر لو انك ابتديت تمرينات حديد
في اختراعات جديده بتحل الموضوع ده اسمها الدعامات المتحركه الكلام ده في منه تقنيه الماني وتقنيه روسي
الدعامات المتحركه بتحل الموضوع ده بالنسبه للرياضيين و بتتكون من تيتانيوم والياف الكربون
انا عندي مشكله زي مشكلتك و وبدات معايا من سنه تقريبا ازلاق غضروفي مع بداية انزلاق فقاري

انا لسه معملتش العمليه بس بفكر فيها ( عمليه مكلفه )
اعمل بحث في جوجل عن الدعامات المتحركه للانزلاق الفقاري

وربنا يشفيك

 

بماذا تنصح ياكابتن من لديه انزلاق ووزنه الزائد يزيد من حدة الأمر فهو لا يستطيع القيام بالتمارين ؟ ويريد انقاص الوزن