سؤال حول نظام الكيتو وقناة دكتور كريم على باليوتيوب

السلام عليكم

انا متابع لقناة فكر تانى على اليوتيوب للدكتور كريم على وهو من المروجين بشدة لنظام الكيتو والاعتماد على الدهون كمصدر للسعرات
ولكن في الحقيقة انا حاوالت انى اتبع النظام ده بس كل لما احاول ابنى نظام غذائي على اساسه بيتضحلى ان النظام ده من اكبر عيوبه ان الواحد بيواجه صعوبة بالغة في انه يعمل نظام غذائي متوازن يقدر يحصل منه كل الفيتامينات والمعادن والاحماض الامينية الضرورية للصحة بدون مكملات خارجية

كمان من عيوبه ان مصدر السعرات من البروتين قليل جدا وعلشان كده بسئل هل اللى بيروحو جيم وبيلعبو حديد يقدرو يمشوعلى النظام ده وفي نقص واضح من البروتين ؟

كمان الدكتور شدد في قناته على ضرورة عدم اكل اى سكريات او فواكه مع ضرورة تقليل الكربهوهديرات في اقل حد ممكن وده بردوا هيقودنا لاننا نفقد الكثير من الفيتامينات والمعادن المتواجد في الفواكه دى وقال كمان ان الانسان مش هيفقد وزنه علشان قلل سعراته وعمل مقطع اسمه وهم تقليل السعرات لانقاص الوزن .. باختصار مفادة كلامه ان الانسان هيفقد وزنه لما يمنع السكريات والكربوهيدرات لانه هيقلل الانسولين ويزيد الحرق

تكلم ايضا على خطورة اللبن وانه بيرفع الحموضة في الدم مما يستهلك الكالسيوم من الدم وانه بيسبب هشاشة عظام بخلاف ان فيه صديد وبعض المكونات الضارة بالجسم

تكلم ايضا عن اضرار الجلوتين واللاكتينز الموجودين في البقوليات والنشويات والخبز ووصفهم بانهم سموم واننا يجب ان نبتعد تماما عن اكل اى شئ فيه قمح والبقوليات يجب اننا ننقعها في مياة لمدة يوم ونطبخهم في حلة ضغط عشان نقلل من اللاكتينز اللى فيهم

السؤال دلوقتى انا حاسس ان الدكتور ونظام الكيتو المتشدد اللى بيروج ليه بيحطنا امام اختيارات محدودة جدا جدا جدا من الاكل اللى ممكن ناكله وده ممكن يصيب بالملل وكمان فقدان عناصر غذائية مهمة من الاكل الممنوع بغض النظر عن هل كل كلامه صحيح ام لا ؟

ارجو من المتخصصين في هذا المنتدى الكريم وعلى رأسهم الكابتن محمد مناقشة كل هذه النقاط الهامة ولكم خالص تحياتي

 

أنا مش متخصص بس يبدو إن الدكتور دا ماشي بمبدأ خالف تعرف وأي هبد يلم مشاهدات وخلاص أو له مدرسه بعينها مش قادر يخرج عنها ومن هنا بيهاجم باقي الأنظمة .
للأسف المجال دا أصبح شأنه شأن جميع المجالات فيه تناقضات رهيبه الرأي وضده في نفس ذات الوقت وكل واحد يقولك دراسة إتعملت في عزبة زعبله بتأكد كلامي .
فيا صديقي العزيز إنتقي من تتابعه وإفرز معلوماتك جيداً وعليك بآراء أصحاب التجارب فغالباً بتكون صادقه وبدون فتي .
وأخيراً في دكاترة رجيم كتير عايز يهد وزن عالميزان فقط علشان يفرح السيدات وعمال يرزع كيتو وصيام متقطع وأنظمة تجويع تودي في داهيه ولا يلقي بالاً إن كان المفقود دهون أم عضلات أو حتى عظام .
النصيحه عن تجربه لا تتهاون في البروتين والعناصر الغذائية الهامه ولا يوجد أفضل من تنظيم سعراتك ولا تسعد بالنقص السريع في الوزن إبدأ بعجز سعرات ٥٠٠ مثلاً من سعرات الثبات وبالتوفيق

 

أدخل وأقراء المقالة هذه وسوف تعرف الجواب من محمد قاعود https://www.egyfitness.com/ما-هو-رجيم-الكيتو-؟دليل-شامل-للمبتدئ-و-ا/

 

https://www.egyfitness.com/هل-الحليب-يسبب-هشاشة-العظام؟/

 

الناس المرضى فقط هم الذي يجب ان يتجنبوه لاكن المتعافين لايحصل لهم شيء https://www.egyfitness.com/هل-الجلوتين-مادة-ضارة-و-تزيد-الوزن؟/

 

متشكر جدا لكل الاخوة اللى ردوا على الموضوع

والله الكابتن محمد قاعود ده فخر وانا بحب اتابعه من زمان واستلقى معلوماتى منه ومن مقالاته القيمة

الراجل ده ثقتى بتزيد فيه زمن بعد زمن لانه بيقضى على الخرافات خاصة في زمن اليوتيوب والسوشيال ميديا اللى للاسف شتتت الناس وفتحت المجالات لكل واحد يطلع يفتى ويقول معلومات كارثية وللاسف بتلاقي ليها متابعات بالملايين وبيقتنعوا بيها بدون بحث او تأكد

وارجو كل من لديه تعليق مفيد او معلومة قيمة يقدر يضيفها ويثري بيها الموضوع لا يبخل علينا بها

فعلا الموقع والمنتدى بالكابتن واعضائه الكرام المثقفين هما حصن ضد الخرافات والدجل المتعلقة بالتغذية والتخسيس