هل كل اللي بتسمعه عن مخاطر العيش صح ؟

السلام عليكم
(العيش في الدايت)

➖➖➖➖➖
خلينا نقول إن الفترة اللي فاتت كلمة (خالي من الجلوتين) أصبحت المرادف لكلمة (صحة وأكل هيلثي)، وبناءا عليه بدأت تظهر تحذيرات من العيش .. القمح (البليلة).. الدقيق ! .. وتنزل بدايل خالية من الجلوتين ، وده من وجهة نظرهم ،هيحسن صحتك، ويخليك تخس .
-
➖➖➖➖➖➖➖➖
ايه القصة دي وبدأت منين ؟
➖➖➖➖➖
بدأت القصة تنتشر لما دكتور اسمه William Davis ، ألف كتاب اسمه Wheat Belly في 2011 بيقول فيه إن القمح بيجيب معظم الأمراض الصحية البشرية، يعني القمح يجيب لك (سكر .. وقلب .. وسِمنة .. وحَب شباب .. وقولون عصبي .. وتربيزات بلياردو وبينج) ! .. القمح بس ! وطبعا السبب كان من الجلوتين اللي زاد في القمح بعد الهدنسة الوراثية! .. طبعا مش محتاج أقولك الكتاب ده انتشر ازاي، لإنك لولاه مكنش وصل لك الهالة اللي اتعملت عن القمح بالحجم ده .
-
➖➖➖➖➖➖➖➖
طيب هل الجلوتين خطر فعلا ؟
➖➖➖➖➖
الجلوتين ده عبارة عن مجموعة (بروتينات ف القمح)، وهتلاحظ اسمه قريب من كلمة (glue أو غراء) لأنه مسئول عن مطاطية العجين، بالاضافة لنفخ العيش ساعة التسوية.. المصادر(1،2) .. وعشان نناقش صحة خطورته هفصص الموضوع معاك حته حته:
-
أولا :
- الجلوتين مش جزيء واحد ، لكن ده عبارة عن ما يسمى بالـ (برولامينات prolamins) وشوية كارب ودهون. المصدر (3)
▪️- (الشوفان) كمان فيه برولامينات برضو زي (Avenin)
▪️- (الشعير والذرة) فيهم برضو برولامينات زي (hordein و secalin وzein) .. المصدر (4)
▪️- بس (القمح) الجلوتين بتاعه فيه برولامينات زي (glutenins و gliadins) ..
كل البرولامينات بتأثر على الأمعاء لكن الـ gliadins بقي اللي في القمح .. المخاوف منه أكتر على الأمعاء.. لكن أمعاء مين اللي في خطر؟
▪️- أمعاء (مرضى الداء الزلاقي أو الـ celiac disease) ، وكل البرولامينات (سواء اللي ف القمح أو الشوفان أو الشعير أو الذرة) ممكن تأثر على (مرضى الـ celiac disease) .. مش القمح لوحده ! المصدر (5) ، واللي يطمنك إن ده مرض نادر الحدوث، يعني بيجي للناس اللي جهازهم المناعي بيهاجم ما يسمى بالـ (intestinal villi ودي عبارة عن بزابيز أو نتوء مجهري في الأمعاء بتمتص المغذيات من الأكل اللي اتهضم).. فيبوظها.. خلل زي ده ممكن يؤدي لمعاناة الشخص من ألم شديد ، وإسهال ، وسوء امتصاص / نقص المغذيات ، أو للموت.. لكن لحسن الحظ انه نادر و(نسبتة 1 ٪) .. المصادر(6،7)..
-
ثانيا :
طب عرفنا إنه مش حلو لمريض بالـ (celiac disease) ..
ايه النظام لو عندي (حساسية من الجلوتين NCGS) أو (مريض قولون عصبي IBS) .. وبيحصل لي انتفاخات ؟
▪️- في دراسات قالت انه ممكن الجلوتين يكون سيء مع حالات الحساسية والقولون العصبي .. زي المصادر (8،9،10،11)
▪️- وفي دراسة قالت ما يمكن العيب ميكونش في الجلوتين ، فتعالا ندي الجلوتين للناس اللي بتشتكي من حساسية الجلوتين بس هنجرب نقطع عنهم حاجة اسمها (الـ FODMAPs أو كربوهيدرات مبيتمش امتصاصها في الأمعاء كويس) ، ولقوا الجلوتين بريء من الانتفاخات اللي كانت بتحصل، والسبب كان فى الـ FODMAPs .. (زي سكر الفاكهة والبقوليات وسكر اللبن).. المصدر (12) ولكن لسه محتاجين أبحاث أكتر تحدد هل الجلوتين السبب ولا الـ FODMAPs هي السبب.
-
ثالثا :
ايه مشكلته مع ناس معندهاش أي مشاكل صحية ؟
▪️- قولنا كل البرولامينات بتأثر على الأمعاء، لكن الـ gliadins اللي في القمح .. المخاوف منه أكتر على نفاذية القناة الهضمية..لأن في بروتين موجود فى أمعاءك اسمه (zonulin) مهمته ينظم قفل وفتح فتحات فى الأمعاء الدقيقة، وكل ما يزيد الـ (zonulin) تزيد الفتحات ، فلما أمعاءك بتتعرض للجلوتين وتحديدا الـ (gliadins) بيزيد الـ (zonulin) فيوسع نفاذية الأمعاء. المصدر (13)
▪️- فبعد ما كانت الأمعاء بتسمح لأكل فى حجم معين، تبدأ تدخله بحجم أكبر المفروض مكنش يدخل إلا لما يتكسر اكتر ويوصل للحجم المطلوب، وده بيتسبب في مضاعفات صحية لأن جهازك المناعي يبدأ يحاول يهاجم الأكل لأن حجمه اللي داخل مش صح وده يسبب إلتهابات..
▪️- عملوا دراسة على أمعاء (خارج الجسم الحي) لنوعين (ناس عندها celiac disease) ، و(ناس معندهاش non-celiac disease) بحيث يشوفوا تأثير الـ (gluten/gliadin) .. والنتيجة الناس المرضى والأصحاء زاد معاهم انتاج بروتين (zonulin) وزادت نفاذية الأمعاء فعلا ، لكن الكلام ده حصل بنسبة أكبر بكتير في عينات (الناس اللي عندها celiac disease) مقارنة بالناس السليمة اللي كانت الزيادة معاهم أقل بكتير ! .. المصدر (14)
▪️- لكن برضو قبل ما تقول حكم نهائي من خلال الدراسة دي وتعممها أفتكر معايا إن ده حصل (خارج الجسم الحي).. ولسه محدش متأكد إن دي نفس الاستجابة اللي ممكن تحصل للأمعاء جوه جسم الإنسان فى ظروف طبيعية .. ولكن كده الموضوع بقى أوضح من حيث درجات الخطورة .. ونقدر نقول الجلوتين خطر فعلا على كل الناس ولا بتتفاوت خطورته من حد للتاني.
▪️- طب وليه النفاذية اللي حصلت للناس الطبيعية دي .. متفضلش توسع توسع توسع لحد ما تضيق علينا المكان ونتعفص ف الحيطة ؟ فنتصاب بالـ (celiac disease) !.. لأ برضو، لازم تكون "مهيأ وراثيا" بمعنى يبقى عندك مشكلة فى جين اسمه (HLA) ، وحط في الحسبان تأثير السموم البيئية والمعادن التقيلة على جسمك اللي ممكن تشارك ف الضرر ، وده يخلينا نقول إن تناول الجلوتين لوحده مش شيء كافي عشان يسببلك مشكلة حقيقية طالما انت مش مهيأ وراثيا لده . المصدر (15)
-
➖➖➖➖➖➖➖➖
طب لو أنا موسوس وحابب أبعد عن الجلوتين خالص؟
➖➖➖➖➖
ممكن تبعد عن الدقيق وأي حاجة معمولة من الدقيق واتأكد إن أي منتج هتشتريه مكتوب عليه جلوتين فري ، والشوفان ممكن يبقى بديل مناسب ليك .
-
➖➖➖➖➖➖➖➖
طب ايه المشاكل التانية في القمح/ العيش/ الدقيق ؟
➖➖➖➖➖
الدقيق الأبيض المكرر نتيجة تقشير وإزالة مكونين مهمين من القمح أو أي زرع عموما بترمي القشر بتاعه (حتى البطاطس) إنت بتقلل محتوى كبير من المعادن والفيتامينات وبترميها في الأرض ، وبتزيل الألياف اللي كانت بتحافظ لك على سكر الدم في معدل مناسب.

البديل اشتري دقيق القمح الكامل ، ولو مش عارف تجيبه هات المكونات دي واخلطها بالنسب اللي فى البوست ده https://bit.ly/2UDi4oX
-
➖➖➖➖➖➖➖➖
الخلاصة: (هتفهمها لما تقرا البوست كويس)
➖➖➖➖➖
▪️- الكلام اللي بيتقال (بحسن نية) وكإنه (صفقة) هتعملها لما هتسيب الجلوتين (صحتك هتتحسن ووزنك هينزل) ، فالخبر السيئ هو إن (البرولامينات) موجودة في أكل كتير بتاكله زي (العيش – المكرونة - وأغلب الحبوب مش القمح بس)، ومفيش شك إن الـ gliadin اللي في الجلوتين أسوأهم ، لكن ده يبين لك إن حتى لو اختزلت الموضوع في (محاربة ثقافة التغميس) فالموضوع مش مقتصر على العيش.
▪️- من الآخر لو هنتكلم بالعلم، مفيش حاجة أبيض وأسود وبس .. المفتاح كله إنك لما تبص للجلوتين تعرف انت ضمن إنهي فئة عشان تحدد درجة خطورته عليك :
- فلو عندك (celiac disease) .. يبقى بلاش جلوتين لأنه خطر 100% عليك.
- ولو (مريض NCGS) أو (مريض IBS) .. جرب تقلل الـ (FODMAPs) .. قبل ما تقلل الجلوتين.
- ولو معندكش أي مشاكل في الهضم و(مناعتك قوية)، دخل العيش والقمح (باعتدال) في نظامك، وده اللي بعمله ليا ولكل الناس.
▪️- وبالنسبة لزيادة الوزن فالموضوع متعلق بتقليل السعرات مش الجلوتين ولا منع القمح !
➖➖➖➖➖➖➖➖
لايك للبيدج : Yalla Transform

 

تحيه كبيره جدآ ليك ياكابتن احمد ما شاء الله مقال رائع شكرآ جزيلآ